广州均价

  新闻讲：前天，广州市国土房管局公布称：广州市11月房价均价是11468元/m2。

  阿六讲：唔少人睇到呢条新闻就会发问：宜家广州仲有一万蚊一方嘅楼买咩？

  广州呢个“均价”够竟有冇呢？话有又得，话冇又得，关键系点样取样统计，系大广州计呢，还系细广州计，得出嘅结果就有打边炉同打屎忽之别。

  从行政区域上讲，传统上嘅广州系“细广州”，指越秀区(包括以前嘅东山区)、荔湾区(唔包括以前嘅芳村区)、天河区(部分)、白云区(部分)，即传统上讲嘅“河北”，呢个区域，无论解放前还系解放后，也无论改革开放前，还系改革开放后，一直都系居住嘅黄金地方，以前住喺河南(即海珠区)嘅市民要到河北，习惯上都叫“去广州”，嗰句著名嘅俗话“宁要河北一张床，唔要河南一间房”就系最好嘅写照。

  如果讲呢个“广州”，宜家有一万蚊一方嘅楼卖，咁买楼嘅人可能会从西门口排到东山口，所以，呢个“广州”均价是11468元/m2系冇可能嘅。

  但经过咁多年发展，广州行政区域已经扩大咗好几倍，已经大到包埋以前觉得冇雷公咁远嘅从化、增城在内嘅十区两市，都叫广州，属于“大广州”，如果话从化有一万蚊一方嘅楼买，咁又冇乜出奇。

  宜家嘅房价统计都只系统计到区一级，始终唔够细化，众所周知，就算同一个区，唔同地头楼价都会有好大差别，所以，如果想“广州均价”更准确，就应该细化到街道一级。